د جرمنې دفاع وزیرې د ټرمپ ادعا رد کړه

د جرمني دفاع وزیرې اورځلا -ون -ډېرلاین د ولسمشر ډونالد ټرمپ دا ادعا رد کړه چې جرمني له ناټو تړونه پوروړې ده.
هغې د ټرمپ دا وینا هم رد کړې چې برلین باید امریکا ته د امنیت ټینګولو لپاره پېسې ورکړي.
ولسمشر ډونالد ټرمپ دجمعې په ورځ په واشنګټن کې د جرمني له صدراعظمې انګېلا مېرکل سره ترکتنې وروسته پر ټویټر ولیکل چې برلین باید د ناټو پور پرې کړي او امریکا ته باید د دې لپاره چې د جرمني دفاع کوي، پېسې ورکړي.
د جرمني دفاع وزیرې اورځلا -ون -ډېرلاین پرون یکشنبې په یوه اعلامیه کې چې د ډونالد ټرمپ په ځواب کې خپره سوه، وویل:”د ناټو د پور هېڅ حساب نسته.”
د ناټو غړیو په ۲۰۱۴ میلادي کال کې موافقه وکړه تر ۲۰۲۴ میلادي کاله به هر غړی هېواد د خپلو کورنیو، ناخالصو تولیداتو ۲ فیصده ددې تړون د دفاعي مصارفو لپاره ځانګړي کوي.
د جرمني صدر اعظمې انګېلا مېرکل ویلي چې حکومت یې دې تړون ته متعهد دی.
د جرمني د دفاع وزیرې په پرونۍ خبرپاڼه کې ویلي چې د دفاعي لګښت د زیاتولو په پلان کې ېې یوازې ناټو نه بلکې د ملګرو ملتونو او اروپايي اتحادیې سوله ساتونکي ماموریتونه او له داعش سره مبارزه هم شاملېږي.

۵۹ ټول کتل سوی شمېر ۱ نن کتل سوی شمېر

د ليکوال په هکله

جان روح الله

تبصره پر وکړه