د امریکا کنفرانس کې د داعش ځپلو لپاره پر ګډې مبارزې بحث کېږي

د افغانستان د بهرنیو چارو وزیر صلاح الدین رباني پرون یکشنبې له داعش سره د مبارزې د نړیوال ائتلاف په کنفرانس کې د ګډون لپاره امریکا ته ولاړ.
ټاکل سوې چې دا نړیوال کنفرانس د چهارشنبې په ورځ په واشنګټن کې جوړسي چې د امریکا د بهرنیو چارو وزیر ریکس ټېلرسن به یې کوربه وي.
افغانستان به د کنفرانس له هغو ګډونکونکو وي چې امنیت یې په مستقیم ډول داعش له ګواښ سره مخامخ کړی دی.
په واشنګټن کې په دې کنفرانس کې د داعش پرضد د مبارزې د نړیوال ائتلاف د ۶۸ غړیو هېوادونو د بهرنیو چارو وزیران ګډون کوي.
د داعش پرضد نړیوال ائتلاف په ۲۰۱۴ میلادي کال کې جوړ سوی دی.
د امریکا د بهرنیو چارو وزارت خبرپاڼه وايي چې د کنفرانس هدف د داعش د ماتولو لپاره د نړیوالو د ګډې مبارزې پیاوړي کول او چټک کول دي.
د خبرپاڼې په حواله، د کنفرانس ګډونکونکي به د داعش د همکارانو، فرعي شبکو او مالي سرچینو د بندولو او همدا راز په عراق او سوریه کې د دې ډلې د پناه ځایونو د له منځه وړلو پرلارو چارو خبرې وکړي.
د افغانستان د بهرنیو چارو وزیر صلاح الدین رباني پرون یکشنبې په کابل کې خبریالانو ته وویل چې د واشنګټن په کنفرانس کې د ګډون ترڅنګ به د امریکا د کانګرس له یو شمېر غړیو او ځیني لوړ رتبه حکومتي چارواکو سره هم د افغانستان پر وضعیت خبرې وکړي.
صلاح الدین رباني زیاته کړه:
د داعش ضد ایتلاف د غړیو هېوادونو د بهرنیو چارو وزیرانو په ناسته کې د ګډون په هدف امریکا ته سفر لرم، د دغه سفر په لړ کې به په یاده ناسته کې د ګډون ترڅنګ د ملګرو ملتونو د سرمنشي، د یو شمېر لوړ پوړو امریکايي چارواکو او د دغه هېواد د کانګرس له غړیو سره هم لیده کاته ولرم.”
د امریکا د بهرنیو چارو وزارت خبرپاڼه وايي، د بهرنیو چارو وزیر ریکس ټېلرسن به په کنفرانس کې پر هغو ستونزو خبرې وکړي چې د امریکا د حکومت له نظره، له داعش سره د نړيوالې مبارزې غړي ورسره مخامخ دي.
نیوزویک خپرونه وايي، د امریکا ولسمشر ډونالد ټرمپ د جنورۍ په اته ویشتمه په یوه فرمان کې له دفاع وزارت او د ګډو ځواکونو له لوي درستیزه وغوښتل چې د داعش د ماتولو لپاره د ضروري اقدامونو یو ابتدايي پلان ورته وړاندې کړي.
د امریکا د بهرنیو چارو وزارت ویلي چې د دې پلان جزئیات لا پټ ساتل سوي دي.
په افغانستان، په ځانګړي ډول په ختیځو ولایتونو کې د داعش د فعالیت د پراختیا له امله اندېښنې د زیاتېدو په حال کې دي.
د بهرنیو چارو وزیر صلاح الدین رباني نه دي ویلي چې د واشنګټن په غونډه کې به په افغانستان کې د داعش د فعالیت او له دې ډلې سره د مبارزې په اړه به د پر کومو ټکو ټینګار کوي.
هغه پرون په کابل کې خبریالانو ته وویل چې افغانستان ته ستره ستونزه هغو تروریستانو پېښه کړې چې ځالې یې په بهرنیو هېوادونو کې دي.

۸۷ ټول کتل سوی شمېر ۶ نن کتل سوی شمېر

د ليکوال په هکله

جان روح الله

تبصره پر وکړه