مرستيال والي يوه لويه زراعتي پروژه افتتاح کړه

ليکوال Ahmed Lodin

د کندهار ولايت مقام اداري او مالي مرستيال عبدالحنان منيب د مرسي کورپس موسسې په همکارۍ د زراعت يوه لويه پروژه افتتاح کړه.
د پروژې د افتتاح په مراسمو کي چي نن سهار د ملي راډيو-ټلوېزيون په انګړ کي جوړ سوي ول، د مرستيال والي تر څنګ د مرسي کورپس موسسې مسئولينو، د اقتصاد، زراعت او نشه يي موادو پر ضد د مبارزې رئيسانو ګډون کړی وو.
دا درې کلنه زراعتي پروژه د کندهار د ۹ ولسواليو تر څنګ په روزګان او هلمند ولايتونه هم فعاليت کوي چي د ۲۵۰ نوي د پستې باغونه، ۳ کشمشخانې، ۴۰۰ د زعفرانو نمايشي قطعې او روزنيز کورسونه پکي شامل دي.
د کندهار ولايت مقام مرستيال عبدالحنان منيب د دې پروژې په تطبيق کي د هر ډول همکارۍ ډاډ ورکړ او ټينګار يې وکړ چي دا پروګرام دي په سمه توګه تطبيق او واقعي حقدار بزګر دي ورڅخه برخمن سي. نوموړي د زراعت رئيس ته سپارښتنه وکړه چي له سوداګرۍ خوني سره دي په همکارۍ د کندهاري بزګرو د حاصلاتو لپاره بازارموندنه وکړي.
د مرسي کورپس موسسې مسئولينو ډاډ ورکړ چي دا پروژه به په کندهار، روزګان او هلمند ولايتونو کي په سمه توګه تطبيق سي او وړ بزګرانو ته به مراجعه وسي.

د ليکوال په هکله

Ahmed Lodin

تبصره پر وکړه