ولسي جرګه تر رايي ورکولو مخکي د کانديد وزیرانو اسناد څيړي

Woola
ليکوال Ahmed Lodin

کندهار ورځپاڼه :
د افغانستان ولسي جرګه د دغې جرګې اړوندو کمېسیونونو ته سپارښتنه وکړه چې د کاندید وزیرانو اسناد وڅېړي.
د دغې جرګې رئیس عبدالروف ابراهیمي د چهارشنبې په ورځ د جرګې په عمومي غونډه کې وویل؛ وکیلان د قانون او خلکو پر وړاندې مکلفیت لري چې معرفي شوېو اتو کاندید وزیرانو ته د باور یا رد رایه ورکړي.
د افغانستان ولسي جرګې شاوخوا ۱۰ میاشتې وړاندې هغه وزیران چې له ۷۰ سلنه کمه انکشافي بودجه یې مصرف کړې وه، استیضاح کړل چې له دې ډلې ۷ وزیران بې صلاحیته شول.
افغان حکومت د تېرې میاشتې په اوږدو کې اته تنه د کورنیو چارو، دفاع، ټرانسپورټ، اقتصاد، د سرحدونو او قبایلو، لوړو زده کړو، مخابراتو او د فواید عامې لپاره نوماند وزیران معرفي کړل چې يو شمېر یې په وزارتونو کې خپلې چارې هم پېل کړي.
د بهرنیو چارو، پوهنې او اطلاعاتو او فرهنګ وزارتونه اوس هم د سرپرستانو له‎خوا اداره کېږي چې حکومت تراوسه په دې اړه تصمیم نه‎دی نیولی.
په ورته وخت کې جمهوري ریاست وايي چې نور کاندید وزیران به هم ولسي جرګې ته معرفي شي.
د ولسمشر د ویاند د دفتر سرپرست شاه حسین مرتضوي تېره ورځ په کابل کې خبریالانو ته وویل، یوه ډله کاندید وزیران د معرفۍ لپاره اماده دي.
ځینو وکیلانو په هغه پخوانۍ پریکړه چې وايي، ټول کاندید وزیران دې په یوځای معرفي شي او بیا دې رایه ورکړي شي ټینګار کاوه، خو یو شمېر نورو بیا ویل چې د هېواد امنیتي او سیاسي وضعیت ته په کتو باید ولسي جرګه د کابینې په بشپړېدو کې له حکومت سره مرسته وکړي.

۲۴۶ ټول کتل سوی شمېر ۹ نن کتل سوی شمېر

د ليکوال په هکله

Ahmed Lodin

تبصره پر وکړه